طعم البعاد صبار .. والغربــة ليل بهتان
ياقلبى ياموجوع .. إياك تكون قلقان
لو طالت المسافات .. انا والأمل اخوات
وتالتنا كان الليل .. دةانا ليا فيها النيل
وليها فيا الروح .. ما اخترتش إنى اروح
ماانا جوعى كان كفران .. ملعون ابوك ياطموح
أخرك تشوفلى كفيل
لكـنى مش قلقـان .. تذكـرتى رايح جـى
انا مش فى بلدى عويل
لكـنى مش بتشاف .. زهرة سنينى عجــاف
مع إنى ليا عزيز .. أفتونى فى رؤياى
لمـوا الأمانى إزاى .. حطوها على الباسبور
احلامى صبحت بور .. ممنوع عليه الضى
لكنى مش قلقان .. تذكرتى رايح جى
البعد عنك خوف .. وأنا ع الرجوع ملهوف
لكنى هعود ازاى .. ومكانى كله ضيوف
ياقلبى ياموجوع .. يا آهه حاضنة دموع
حب البلد بيعيش .. لما يموت الجوع
ياحضن بيساعنى .. واحتجت له وباعنى
ساعة ما مد إيديه .. شاور وودعنى
لكـنى مش قلقـان .. تذكـرتى رايح جـى
